Þurfti ekki að hugsa sig um

Síðara mark Skagamanna á KR-vellinum í fyrrakvöld verður lengi í minnum haft og margir eru farnir að tala um það sem mark ársins. Það vildi þannig til að Igor Pesic, miðjumaður ÍA, fékk boltann á eigin vallarhelmingi eftir að Kristján Finnbogason, markvörður KR, átti misheppnaða aukaspyrnu framarlega á vellinum og var of seinn að hlaupa til baka. Pesic hugsaði sig ekki um tvisvar og lét vaða á markið af næstum sextíu metra færi og náði að skora. Fréttablaðið sló á þráðinn til Pesic og spurði hann út í atvikið. "Ég var búinn að vera að fylgjast með Kristjáni markverði allan leikinn og ég tók eftir því að hann leikur mjög framarlega á vellinum og virkar stundum eins og aftasti varnarmaðurinn hjá þeim. Svo þegar aukaspyrnan hans mistókst og Pálmi skallaði hana fyrir fætur mér, kom aðeins eitt til greina - að láta vaða á markið," sagði Pesic. Mark hans var enn sætara þegar haft er í huga að það tryggði Skagamönnum fyrsta sigurinn á KR í Vesturbænum í tólf ár. "Strákarnir í liðinu sögðu mér frá því hvað væri í húfi þegar þessi lið mætast og því var það mér sérstaklega mikilvægt að ná að leggja mitt að mörkum í sigrinum. Langskot eru í rauninni mín sterkasta hlið sem leikmanns og ég veit að ég hef alla burði til að gera svona hluti á knattspyrnuvellinum. Ég hef mikla trú á sjálfum mér, annar gæti ég ekki gert svona hluti," sagði geðþekki Serbinn, sem sagðist ekki æfa svona skot sérstaklega. "Mér líður mjög vel á Íslandi og það er reglulega fínt að vera á Akranesi að spila fótbolta, þó það taki mig eitthvað lengri tíma að komast alveg inn í boltann sem er spilaður hérna. Ég hef enn ekki sýnt mínar bestu hliðar og hlakka mikið til að sýna hvað í mér býr í sumar," sagði Pesic að lokum.