Metró víkur fyrir úbersexúal

Metrómaðurinn er dauður. Í staðinn er kominn karlmaður sem er übersexual og lifir eftir nýrri skilgreiningu karlmennskunnar. Svona mikið er víst: David Backham er metrósexúal maður, nánast óþægilega vel snyrtur og með stærri fataskáp en flestir kvenmenn. Örlög þessa fyrirbrigðis voru öllum ljós: dauði og það fyrr en síðar. Nú er stundin runnin upp - sem gætu verið góðu fréttirnar - en það eru sömu þrjár konurnar og fundu metrómanninn upp sem drápu hann - og það eru eiginlega vondu fréttirnar. Því metrómaðurinn á sér arftaka, M-karlinn sem er úbersexúal. Og hverjir eru það? Það eru karlmenn sem eru mjög aðlaðandi, kraftmiklir og eru þeir sem bera af meðal jafnaldra sinna. Þeir hafa sjálfstraust án þess að vera hrokafullir, karlmannlegir, bera skynbragð á tísku og gæðum á öllum sviðum. Úbersexúal-karlmaðurinn leggur meiri áherslu á sambönd en metrómaðurinn en er jafn spenntur fyrir innkaupaferðum og hann. Áherslan er þó á ákveðna hluti en ekki verslunaræði verslunaræðisins vegna. Bestu vinir úbersexúal-karlsins eru karlar en konur eru aldrei félagar hans. Lykilatriði hjá úbersexúarl-karlinum, segir þríeykið sem fann um metrómanninn, eru hefðbundin karlmennskugildi eins og kraftur, heiður og skapgerð í blandi við jákvæð kvenleg gildi eins og umönnun, samskipti og samvinnu. Og hvaða karlar eru það sem teknir eru sem dæmi um þessa nýjustu útgáfu hins fullkomna karlmanns? George Clooney og Donald Trump. Því er hér með spáð að innan skamms verði kynnt enn ein útgáfa af draumakarlinum, senior-sexual, karlmaðurinn til að eldast með. Traustur, notar viagra og á stóran bankareikning. Aðrir kostir eru óþarfi.