Mótmæltu lélegum stólum

Hann hefur nú setið á valdastóli í tvo áratugi, bæði hjá ríki og borg. Færri vita hins vegar að fyrir 40 árum stóð Davíð Oddsson sjálfur í stríði við kerfið, þegar hann og fleiri nemendur í Gaggó Vest mótmæltu stólunum sem voru í skólastofunum. Nemendur töldu þá heilsuspillandi og draga úr námsárangri. Margir þjóðþekktir einstaklingar, sem hafa haft áhrif á íslenskt samfélag, voru í Gaggó Vest. Þetta var kynslóð sem lét í sér heyra og lá ekki á skoðunum sínum. Svona hljóðuðu til að mynda stólamótmæli nemenda í þriðja bekk í Gagnfræðaskóla Vesturbæjar veturinn 1964-1965: „Vér undirritaðir nemendur í Gagnfræðaskóla Vesturbæjar mótmælum eindregið þeim stólum sem oss er ætlað að notast við í kennslustundum. Vér teljum stólana algerlega ónothæfa og skaðlega heilsu vorri, jafnframt því að þeir draga úr námsárangri nemenda. Þar að auki eyðileggjast föt meira eða minna vegna núnings við botnplötuna. Vér teljum að þar sem hver barnaskólinn á fætur öðrum fær nú ný og glæsileg húsakynni til afnota, búin þægilegum húsgögnum, að það sé alger óhæfa að jafn þýðingarmikill skóli og Gagnfræðaskóli Vesturbæjar skuli vera búinn svo óviðunandi húsbúnaði. Vér heitum því á forráðamenn skólanna að veita oss liðsinni í þessi máli með því að útvega skóla vorum endurbætta aðstöðu til náms." Þórður S. Gunnarsson, núverandi forseti lagadeildar Háskólans í Reykjavík, skrifaði textann og meðal þeirra sem rita undir eru: Davíð Oddsson, fyrrverandi forsætisráðherra og núverandi utanríkisráðherra, Ólafur Kvaran, forstöðumaður Listasafns Íslands, Helgi Skúli Kjartansson sagnfræðingur, Gunnlaugur Sigmundsson, fyrrverandi alþingismaður, Helga Benediktsdóttir arkitekt og Snorri Þórisson kvikmyndagerðarmaður. En mótmælin báru ekki árangur og urðu nemendur að sætta sig við að nota gömlu, hörðu stólana áfram. Gunnlaugur Sigmundsson segir að hann muni vel eftir stólunum. Þeir hafi ekki verið þægilegir en stólarnir hafi verið heldur skárri þegar hann hafi komið í MR þótt ekki hafi þeir beinlínis verið góðir, en það segi sína sögu um stólana í Gaggó Vest. Aspurður hvort aðstaðan hafi haft áhrif á heilsu hans síðar á lífsleiðinni svarar Gunnlaugur því neitandi. „Að vísu hef ég verið slæmur í baki lengi og ég ætti kannski að fara í mál við ríkið út af þessu ef hægt er að sanna að þessir stólar hafi haft þessi áhrif á mig,“ segir Gunnlaugur í léttum tón.