Stjórnin tekur málið upp

Varaformaður fjárlaganefndar Alþingis telur Íbúðalánasjóð ekki hafa haft samráð við stjórnvöld þegar hann gerði lánasamning við bankana. Hann segist viss um að stjórnarflokkarnir muni taka þetta mál upp til að tryggja að það endurtaki sig ekki. Einar Oddur Kristjánsson, varaformaður fjárlaganefndar Alþingis, segir nauðsynlegt að hið opinbera gæti sín í hverju spori þegar velgengnin er svo mikil í efnahagsmálum. Nauðsynlegt sé að ríkisstofnun eins og Íbúðalánasjóður hafi náið samstarf með þeim sem stjórna efnahagsmálum í landinu þegar ákvarðanir eru teknar um að ráðstafa miklu fé. Sjóðurinn hefur lánað bönkunum 80 milljarða króna gegn veði í fasteignum. Hann tekur á sig alla ábyrgð ef fasteignaverð lækkar meira en skuldum nemur. Aðspurður um þau svör sjóðsins að hann hafi haft allar heimildir til að ráðstafa fénu segist Einar ekki ætla að deila um það. Almenn skynsemi segi mönnum að æskilegt sé að hafa samráð í svona málum þegar hættan á þenslu er jafn mikil og raun ber vitni, hvað þá með hliðsjón af upphæðinni. Einar telur að þetta mál verði tekið upp hjá stjórnvöldum. Einar Oddur segir ummæli Péturs Blöndals, flokksbróður síns, í garð félagsmálaráðherra vera slæm. Hann segir hægt að teysta því að ráðherra hafi ekki farið vísvitandi með rangt mál. Jóhanna Sigurðardóttir segir ásakanir sem bornar hafa verið á Íbúðalánasjóð mjög alvarlegar. Orðið hefur verið við kröfu Jóhönnu um að halda fund um málið í félgasmálanefnd.