Drengur missti meðvitund í sundkennslu

Ellefu ára drengur var hætt kominn í sundkennslu í sundlauginni í Bolungarvík í gærmorgun. Bæjarins besta greinir frá því að drengurinn hafi látið sig fljóta með andlitið í kafi en þegar hann hafði verið þannig nokkuð lengi fór félaga hans að gruna að ekki væri allt með felldu. Hann reyndist meðvitundarlaus og þurfti sundkennarinn að beita blástursaðferðinni til að koma honum til meðvitundar sem tókst á skömmum tíma. Drengurinn var engu að síður fluttur á Fjórðungssjúkrahúsið á Ísafirði til rannsóknar. Hann gisti á sjúkrahúsinu í nótt en að sögn vakthafandi hjúkrunarfræðings mun hann ná sér að fullu.