Hreindýraveiðar í tísku

Aldrei fyrr hafa fleiri viljað komast á hreindýraveiðar en nú og verða átta hundruð veiðimenn frá að hverfa. Fólk virðist ekki setja verðið fyrir sig enda hreindýraveiðar í tísku, segir sölumaður leyfanna, sem vill auka kvótann. Í dag rann út frestur til að sækja um leyfi til að veiða hreindýr síðsumars og er óhætt að tala um sprengingu í eftirspurn. Fyrir fimm árum voru veiðileyfin aðeins fjögur hundruð talsins og seldust þá ekki upp. Í ár eru tvær umsóknir um hvert leyfi þótt þeim hafi verið fjölgað í átta hundruð. Skýringin liggur ekki á lausu. Karen Erla Erlingsdóttir hjá Hreindýraráði Íslands segir að ein skýringin geti verið rjúpnabannið þar sem eftirspurn eftir hreindýraveiðleyfum hafi aukist mikið í kjölfar þess að umhverfisráðherra bannaði rjúpnaveiðar. Þá telur hún það sé í tísku að fara á veiðar. fólk setur ekki peningana fyrir sig, segir Karen. Verðið á leyfunum er allt að 110 þúsund krónur og annað eins getur kostað að ráða leiðsögumann og fá flutning á skepnunni. Allir sitja við sama borð því dregið verður úr leyfunum, sumir verða heppnir en aðrir ekki. Karen segir marga óánægða en Hreindýraráð geti ekkert gert, ekki sé úr fleiri leyfum að spila. Sú spurning hefur vaknað, í ljósi þessarar miklu eftirspurnar, hvort ekki eigi að selja leyfin hæstbjóðendum. Karen bendir á að hugsanlega sé um auðlind að ræða og auka megi kvótann. Þá megi einnig velta því fyrir sér hvort ekki eigi að fjölga dýrunum og lofa þeim að nema land norðar en þau eru nú.