Óttast árásir á stjórnmálamenn

Tifandi tímasprengjur. Þannig lýsir norska lögreglan 40 mönnum sem óttast er að muni gera árásir á stjórnmálamenn í landinu. Yfirmaður öryggisdeildar lögreglunnar segist óttast slíkar árásir meira en hryðjuverk. Lögreglan í Noregi hefur sett saman lista yfir mennina 40 sem óttast er að muni gera árásir á stjórnmálamenn og aðra háttsetta menn í Noregi. Yfirmenn öryggismála í lögreglunni segja þetta vaxandi vandamál og hafa af því miklar áhyggjur. Jörn Holme, einn þeirra, segir að hættulegum mönnum fjölgi í Noregi. Hluti þeirra geti verið útlendingar en þeir geti verið hættulegir vegna þess að þeir eigi við gerðæn vandamál að stríða. Menn geti farið yfir um og þá verði að koma í veg fyrir að þeir ráðist á stjórnmálamenn og aðrar opinberar persónur. Einn mannanna á listanum er af angólskum uppruna. Hann ógnaði meðal anars nýlega Kjell Magne Bondevik, forsætisráðherra Noregs, og tveimur öðrum stjórnmálamönnum. Hann situr nú í gæsluvarðhaldi og er einn örfárra á listanum sem hefur verið nafngreindur í fjölmiðlum. Flestir mannanna 40 eru hins vegar frjálsir ferða sinna þrátt fyrir að lögreglan hafi þá grunaða um að hafa illt í hyggju. Skemmst er að minnast morðsins á Önnu Lindh, utanríkisráðherra Svíþjóðar, sem einmitt var myrt af manni sem svipar mjög til lýsingarinnar á mönnunum á listanum. Hann var af erlendu bergi brotinn og átti við geðræn vandamál að stríða þegar morðið var framið.