Gekk eins og í lygasögu

Fyrsta þríburafæðingin í áratugi, þar sem börnin voru ekki tekin með keisaraskurði, gekk eins og í lygasögu segir Sveinborg Hauksdóttir sem fæddi þrjú börn á aðeins fimmtán mínútum, tvær stúlkur og einn dreng. Þríburar eru alla jafna teknir með keisaraskurði en Sveinborg óskaði eftir því að fá að eignast börnin á náttúrulegan hátt. Það varð úr og gekk allt að óskum þegar börnin þrjú komu í heiminn síðasta föstudag. Sveinborg og Stefán Arinbjarnarson eiga eitt barn fyrir, soninn Bjart Fannar sem er tíu ára gamall. Lítil fjölskylda á Álftanesinu stækkaði því um helming á einu bretti. Foreldrarnir segja starfsfólk Landspítalans hafa reynst afskaplega vel og kunna því bestu þakkir fyrir. Aðspurð hvort nöfn hafi verið valin á þríburana segir Sveinborg að ekki hafi verið gengið frá því enn. Hún segist þó ekki hafa neinar áhyggjur af því að það verði vandamál, Stefán hafi sagst geta ákveðið tvö nöfn á hvert barn án þess að lenda í neinum vandræðum með það. Bæði móður og börnum heilsast vel.