Mat á Baugsverði dregist í 18 mán

Matsnefnd um verð á hlutabréfum í Baugi mun loks skila af sér niðurstöðu í málinu í ágúst, meira en einu og hálfu ári eftir að hún var skipuð. Nefndarmenn viðurkenna að fyrrverandi hluthafar í Baugi, sem ekki sættu sig við verðið sem þeir fengu fyrir bréf sín við þvingaða yfirtöku, hafi mátt bíða allt of lengi. Þegar hlutabréf í Baugi fóru af markaði fyrir um þremur árum var langflestum hluthöfum greitt út á hæsta gengi síðustu sex mánaða þar á undan. Sparisjóður Mýrarsýslu, Sundagarðar hf. og þrettán einstaklingar sættu sig hins vegar ekki við þetta og kærðu málið. Héraðsdómur Reykjavíkur skipaði þá Kristján Jóhannsson og Gunnar Þór Ásgeirsson sem matsmenn í málinu í desember árið 2003. Þeirra hlutverk var að meta raunverulegt verðmæti Baugs og eignahlut þeirra sem kærðu. Nú meira en einu og hálfu ári síðar bólar enn ekkert á niðurstöðu í málinu. Bæði Gunnar og Kristján sögðu í samtali við fréttastofu í dag að það hefði dregist að fá gögn frá Baugi vegna málsins og síðan hefðu þeir báðir lent í miklum önnum vegna annarra verkefna og því hefði það dregist að klára málið. Gunnar sagði að verið væri að vinna í málinu og niðurstöðu væri að vænta í lok ágúst, eða skömmu eftir þingfestingu í Baugsmálinu svokallaða. Það væri heilmikið mál að meta hlutabréf í jafnstóru fyrirtæki og Baugi og tæki einfaldlega sinn tíma. Gunnar vildi ekki tjá sig um hvort Baugsmálið hefði haft einhver áhrif á framvindu matsins á hlutabréfunum í Baugi. Hann vildi heldur ekkert tjá sig um hvort málið hefði flækst eftir því sem það hefði dregist, en viðurkenndi að það hefði dregist allt of lengi. Löglærðir sérfræðingar sem fréttastofan ræddi við í dag sögðust ómögulega geta séð að það væri margra mánaða verk að meta verðmæti bréfanna. Eftir því sem lengra liði yrði málið eðli málsins samkvæmt flóknara og flóknara og ekki síst eftir að ákærur voru gefnar út í Baugsmálinu. Fyrir Sparisjóð Mýrarsýslu sem átti 911 þúsund hluti í Baugi og Sundagarða sem átti fjórar milljónir og 833 þúsund hluti gæti verið um verulegar upphæðir að ræða.