Nýr skólastjóri í Landakotsskóla

Stjórn Landakotsskóla réði í gær Fríðu Regínu Höskuldsdóttur skólastjóra í Landakotsskóla. "Ég tel að við höfum valið hæfasta umsækjandann með tilliti til menntunar, kennslureynslu og stjórnunarreynslu," segir Björg Thorarensen, formaður stjórnar skólans. Fríða tekur formlega til starfa um næstu mánaðamót. Hún var áður skólastjóri í Mýrarhúsaskóla á Seltjarnarnesi en fékk ekki skólastjórastöðu í nýjum skóla eftir að hann sameinaðist Valhúsaskóla og varð að Grunnskóla Seltjarnarness. Í kjölfar þess fór Fríða í nám í uppeldis- og kennslufræðum við Háskólann í Osló og lauk því námi fyrir stuttu. "Ég hlakka til að takast á við þetta verkefni," segir Fríða um nýja starfið. Hún segir það vera áskorun að leiða þessar deilur til lykta og hún hefur fulla trú á að henni takist það. Hún vill að öðru leyti ekki tjá sig um deilurnar sem hún þekkir enn sem komið er eingöngu til úr fjölmiðlum. Hún bjóst við að funda frekar með stjórn skólans á miðvikudaginn.