Svarfdælingar vilja út

Íbúar í Svarfaðardal hafa sent öllum þingmönnum landsins áskorun um að endurskoða forsendur fyrir sameiningu sveitarfélaga og íhuga um leið möguleika á því að sveitarfélög, sem vilja ganga út úr sameiningu, geti gert það.               Mikill meirihluti Svarfdælinga vill ganga út úr Dalvíkurbyggð þar sem þeir telja að afleiðingar sameiningarinnar hafi orðið þver öfugar við forsendur hennar og önnur fyrirheit. Félagsmálaráðherra þver tekur hinsvegar fyrir að það sé hægt. Svarfdælingar telja að sú staðreynd kunni að hafa áhrif á fyrirhugaðar sameiningarkosningar í haust, þar sem íbúar í fámennum sveitarfélögum muni nú hugsa sig tvisvar um áður en að þeir kjósa að sameinast stórum sveitarfélögum. Svarfdælingar telja að bæði hafi verið brotnar á sér leikreglur og landslög, en að þeir sitji fastir í Dalvíkurbyggð, þrátt fyrir að þeir vilji segja skilið við hana. Eins og fram heufr komið í fréttum brenna skólamálin meðal annars á Svarfdælingum, en stjórnendur Dalvíkurbyggðar ætla að leggja grunnskólann í sveitinni niður og aka nemendum úr dalnum í skóla til Dalvíkur.