Spáð straumi til Eyja

Að sögn þeirra sem fylgjast með þróuninni fyrir verslunarmannahelgina virðast Eyjar ætla að verða vinsælastar þetta árið. Hjá flugfélagi Íslands hefur þegar verið tekin ákvörðun um fjölmörg aukaflug til Eyja, enda eftirspurnin þegar orðin þó nokkur, þó að júlímánuður sé enn ekki hálfnaður. Sömu sögu er að segja hjá kynnisferðum, sem svara á hverjum degi fjölmörgum fyrirspurnum um pakkaferðir til Vestmannaeyja. Útlit er fyrir að flestar skipulagðar skemmtanir um fríhelgi Verslunarmanna verði sígildar og má þannig auk Þjóðhátíðar í Eyjum nefna Eina með öllu á Akureyri, fjölskylduhátíð í Galtalæk, kantrýhátíð á Skagaströnd, Síldarævintrýrið á Siglufirði og Neistaflugið á Neskaupsstað. Eins og venjulega má gera ráð fyrir að veðrið hafi stór áhrif á það hvert fólk skellir sér, og jafnvel má búast við að höfuðborgarbúar, langþreyttir á rigningartíð, elti góða veðrið enn frekar þetta árið en alla jafna. Fyrir ósvikin borgarbörn og sanna rigningarvini verður svo boðið upp á innipúkann, sem að þessu sinni verður haldinn á skemmtistaðnum NASA við Austurvöll.