Mikil kjaraskerðing

"Verðhækkanir á dísilolíu hafa í för með sér gríðarlegan kostnaðarauka," segir Hlynur Snæland Lárusson, deildarstjóri bílaútgerðar hjá ferðaskrifstofunni Snæland Grímssyni. "Sérstaklega er um mikla kjaraskerðingu að ræða fyrir þröngan kjarna manna sem lifa á bílaútgerð." Hlynur hefur áhyggjur af því hvaða áhrif verðhækkanir á díselolíu um síðustu mánaðamót hafa á ferðaþjónustu sem byggir á jeppa- og rútuferðum. "Ferðirnar eru dýrar og þess vegna er erfitt að hækka verðið," segir Hlynur. "Verðhækkanir koma í það minnsta til með að draga mikið úr jeppaferðunum, jafnvel ganga að þeim dauðum." Hlynur segir einnig fyrirsjáanlegt að verr muni ganga að selja erlendum fyrirtækjum hvataferðir. "Það er slæmt þar sem þessar ferðir eru seldar utan háannatíma og skilja yfirleitt mjög mikið eftir sig." Engar ákvarðanir hafa enn verið teknar um framhald jeppa- og rútuútgerðar hjá fyrirtækinu að sögn Hlyns. "Það er þó ljóst að grundvöllurinn fyrir þessum ferðum hefur versnað mjög mikið." Skúli H. Skúlason, formaður Ferðaklúbbsins 4x4, segir dæmi þess að fólk í þeirra hópi hafi skipt dísilbílum sínum út fyrir bensínbíla. "Það er ekki ódýrara að reka bensínbíl en fólk fær annað í staðinn sem það sækist eftir, snarpari vélar og léttari bíla til dæmis," segir Skúli. "Það er ekki síst slæmt í ljósi þess að þeir sem mest ferðast hafa hingað til verið sá hópur almennings sem helst hafa notað dísilolíu." Skúli segir að klúbburinn gæti sætt sig við breytingar á verði dísilolíu út frá umhverfissjónarmiðum ef þær ýttu undir aukna notkun á dísilbílum. "Þegar lítrinn af dísilolíu er hins vegar orðinn jafndýr og jafnvel dýrari en bensín sjáum við alls ekki að þessi umhverfissjónarmið náist fram."