Minni losun gróðurhúsalofttegunda

Heildarútstreymi gróðurhúsalofttegunda minnkaði um rúmt prósent milli áranna 2002 og 2003. Helstu ástæður lækkunarinnar eru minna útstreymi frá sjávarútvegi og landbúnaði en útstreymi frá samgöngum, iðnaði og byggingarstarfsemi jókst milli ára. "Útstreymi í sjávarútvegi fylgir því hversu langt þarf að sækja aflann og hversu mikið er framleitt," segir Óttar Freyr Gíslason, sérfræðingur hjá umhverfisráðuneytinu. "Einnig er reynt að stuðla að betri orkunýtingu í fiskiskipaflotanum en það gengur upp og ofan." Landbúnaður hér á landi er að dragast saman og skýrist minni losun gróðurhúsalofttegunda af því að sögn Óttars Freys. Ástæða er þó til þess að ætla að útstreymi sé að aukast á ný en tölur um losun lofttegunda árið 2004 liggja ekki fyrir. "Allt útlit er fyrir að framkvæmdir fyrir austan og mikill hraði á hagkerfinu, auk álveranna sem verið er að reisa, skili sér í aukinni losun gróðurhúsalofttegunda árin 2005 og 2006," segir Óttar Freyr.