Elva Ósk fermir dóttur sína

"Ég er ekki að skilja öll þessi læti," segir Elva Ósk Ólafsdóttir leikkona þegar hún er spurð hvort hún sé búin að öllu fyrir fermingu dóttur sinnar en hún fermist 19. mars næstkomandi. "Ég ætla að halda veisluna heima og undirbúningurinn gerist smám saman í rólegheitunum. Þetta vex mér ekki í augum enda verður bara gaman að fá gamlar og skemmtilegar frænkur í heimsókn. Ég vil að þetta verði dagurinn hennar og ég sé ekki að þetta verði eitthvað mál." Fermingabarnið, Agnes Björt Andradóttir, er hins vegar orðin afar spennt. "Ég er búin að hugsa um þetta síðan ég var lítil og nú er loksins að verða að þessu," segir Agnes Björt og bætir við að draumafermingakjóllinn sé prinsessu kjóll skreyttur pallíettum og púffi. "Við erum ekki búnar að finna fötin en hún fær alveg að ráða," segir Elva Ósk. "Ég man að þegar ég fermdist að þá var mikið lagt upp úr því að kaupa eitthvað praktískt enda notaði ég mín brúnu flauels jakkaföt mikið eftir fermingu en ef hún vill eitthvað ópraktískt þá gerir hún það," segir hún og heldur áfram að rifja upp fermingadaginn. "Ég skildi ekki allt þetta vesen. Allt í einu var ég orðin voðalega merkileg og ástæða þess að allt þetta fólk kom í veislu. Nokkrum vikum fyrir ferminguna höfðum við vinkonurnar ákveðið að lita á okkur hárið en kunnum ekki enskuna betur en svo að við settum festinn út í sem átti ekki að gera svo ég endaði með kolsvart hár, en ég hafði verið að safna ægilega fínu ljósu hári sem átti að setja upp í greiðslu. Á fermingardaginn var ég því með svo stutt hár að það lá við að líma yrði rósina svo hún myndi tolla." Lestu meira í tímaritinu Magasín sem fylgir DV í dag.