Um sextíu börn bíða eftir leikskólaplássi

Alls vantar 68 starfmenn á leikskólum höfuðborgarsvæðisins samkvæmt síðustu úttekt Menntasviðs Reykjavíkurborgar. Þar af vantar 54 leikskólakennara, 3,5 stöðugildi í sérkennslu og tvo deildarstjóra. Einnig vantar fólk í eldhús, skilastöður og afleysingar.

Fæst starfsfólk vantar í Fossvoginn og Háaleitishverfi en flest í Breiðholtið. Enn fremur bíða um 60 börn í borginni eftir leikskólaplássi en í Árbæ og Grafarholti hafa öll börn verið tekin inn, að einum leikskóla frátöldum. Hingað til hefur þurft að mæta manneklu með því að stytta opnunartíma leikskólanna en að sögn Gerðar G. Óskarsdóttur, sviðsstjóra menntasviðs Reykjavíkurborgar, er þess ekki þörf lengur.

Tekist hefur að manna um 30 stöður frá því í haust, þar af fimm á síðustu þremur vikum. Björg Bjarnadóttir, formaður Félags leikskólakennara, telur kjör leikskólakennara valda manneklunni. "Mér fannst Þorgerður Katrín, og raunar flestir sem tóku þátt í umræðunni á Alþingi, benda á rót vandans sem er fyrst og fremst kjörin," segir Björg.

Í utandagskrárumræðu Alþingis á fimmtudag deildu menn um hvar ábyrgðin lægi. Katrín Júlíusdóttir, þingmaður Samfylkingar, sagði helming þeirra sem sóttu um í Kennaraháskóla Íslands hafa fengið frávísun vegna fjárskorts og úr því þyrfti ríkið að bæta.

Þorgerður Katrín benti hins vegar á að um 400 menntaðir leikskólakennarar störfuðu annars staðar en í leikskólum og að það væri sveitarfélaganna að skapa viðunandi starfsumhverfi svo að fleiri kysu að starfa við leikskólakennslu.

Björg telur að fólk sé loks að átta sig á vandanum en það sé auðvitað ekki nóg að tala um hlutina heldur verði einnig að standa við þá. Kjarasamningar leikskólakennara verða ekki lausir fyrr en á næsta ári og því sé lítið hægt að gera að svo stöddu. Björg segir þó að stuðlað verði að því að kjaramálin verið kosningamál í næstu sveitarstjórnarkosningum.