Ríkisútvarpið verður gert að hlutafélagi

Stóra breytingin frá því að frumvarpið var fyrst lagt fram í vor er að nú er gert ráð fyrir að Ríkisútvarpinu verði breytt í hlutafélag, segir Þorgerður Katrín Gunnarsdóttir menntamálaráðherra. Frumvarpið var kynnt í þingflokkum stjórnarflokkanna í gær og vonast Þorgerður Katrín til þess að geta mælt fyrir frumvarpinu áður en þingið gerir hlé á störfum sínum fyrir jól.

Í upphafi var gert ráð fyrir að Ríkisútvarpið yrði sameignar­félag í eigu ríkisins en á því voru taldir ýmsir meinbugir. Í frumvarpinu er gert ráð fyrir takmörkun á svigrúmi Ríkis­útvarpsins til þess að taka þátt í öðrum rekstri, en slík ákvæði verða að að vera í lögum samkvæmt ábendingum frá Eftirlitsstofnun EFTA um aðskilnað samkeppisreksturs. Slíkur rekstur verður engu að síður að vera í tengslum við starfsemi ríkisútvarpsins þótt hann teljist ekki almannaþjónusta.

Þorgerður Katrín segir að skerpt sé á almannaþjónustuhlutverki RÚV í frumvarpinu. Í mínum huga er það alveg skýrt að veigamestu hlutverkin fyrir utan öryggishlutverkið eru fréttaþjónusta og menningarhlutverk sem snertir fyrst og síðast innlenda dagskrárgerð. Ég vonast til þess að með nýju fyrirkomulagi komi Ríkisútvarpið til með að styrkja sig enn frekar á því sviði. Fyrirséðar eru þær breytingar á rekstri RÚV að innheimtudeildin verði lögð niður enda gert ráð fyrir að það verði eftirleiðis fjármagnað með nefskatti en ekki afnotagjöldum.

Réttur starfsmanna þar verður tryggður fram yfir breytingarnar og að öðru leyti verður vel séð fyrir réttindum starfsmanna, segir menntamálaráðherra.

Gert er ráð fyrir að nefskatturinn greiðist af einstaklingum og lögaðilum. Ungmenni átján ára og eldri þurfa ekki að greiða þann skatt ef þau eru í foreldrahúsum og tekjur þeirra undir 855 þúsund krónum á ári. Lífeyrisþegar og öryrkjar verða undanþegnir skattinum.

Þorgerður Katrín segir að niður­staðan sé sú að taka Ríkis­útvarpið ekki af auglýsingamarkaði að sinni, hvorki í hljóðvarpi né sjónvarpi. "Með breytingunum teljum við að tækifæri gefist til hagræðingar og betri nýtingar á fjármunum, segir menntamálaráðherra. Ég tek þessu mjög fagnandi. Þarna tel ég að sé verið að uppfylla annað skilyrðið fyrir því að Ríkisútvarpið geti í raun sinnt sínu hlutverki," segir Páll Magnússon útvarpsstjóri.

Hitt skilyrðið er svo að tryggt sé að hluta­félaginu fylgi hlutafé svo það geti starfað.