Eigendur beita sér ekki

Kristinn Björnsson, stjórnarformaður Straums og fyrrum forstjóri Skeljungs, og nánasti frændgarður hans á stærri hlut í Morgunblaðinu en sem nemur hlut Baugs í 365 miðlum, sem meðal annars eiga Fréttablaðið. Kristinn er eiginmaður Sólveigar Pétursdóttur, forseta Alþingis, en saman eiga þau rúmlega 12 prósenta hlut í Árvakri, útgáfufélags Morgunblaðsins. Þá eiga þrjú eignarhaldsfélög í eigu náinna skyldmenna Kristins tæplega átta prósenta hlut í Árvakri hvert en þau eru í eigu þriggja barna Hallgríms Benediktssonar. Hallgrímur Benediktsson var föðurafi Kristins Björnssonar og eru eignarhaldsfélögin þrjú því í eigu Kristins og fjölskyldu hans í föðurætt og fjölskyldna tveggja föðursystkina hans. Baugur Group á stærsta hlutinn í 365 miðlum, sem reka meðal annars Fréttablaðið, DV, Stöð 2 og Bylgjuna, eða tæp 32 prósent. Davíð Oddsson, fyrrum forsætisráðherra, sakaði nýlega eigendur fjölmiðla á Íslandi um að misnota fjölmiðla sína. „Auðvitað er það svo að allir eigendur hafa áhrif á það sem þeir eiga," sagði hann að loknum síðasta ríkisstjórnarfundi sínum á dögunum. Fréttablaðið hafði samband við Kristinn Björnsson og spurði hann hvort hann, sem einn stærsti eigandi Morgunblaðsins, kannaðist við að eigendur beittu sér hvað varðar efnistök fjölmiðla sinna. „Ég hef aldrei orðið var við það." Jóhannes Jónsson, einn stærsti eigandi 365 miðla, segir að Baugi hafi aldrei dottið í hug að reyna að hafa áhrif á umfjöllun fjölmiðla 365. „Okkur hefur aldrei dottið það í hug. Þessi fjárfesting hefur aldrei verið hugsuð til þess að gæta hagsmuna okkar, nema fjárhagslega. Þetta er spennandi fjárfesting og það hefur sýnt sig að með góðu starfsfólki er hún er að skila sér," segir Jóhannes.