Íslensk fegurð

Unnur Birna er fjórða íslenska konan sem ber titilinn ungfrú heimur. Áður hafa Guðrún Bjarnadóttir, Hólmfríður Karlsdóttir og Linda Pétursdóttir skartað kórónunni eftirsóttu. Sautján ár eru síðan Linda hlaut titilinn ungfrú heimur.

Guðrún Bjarnadóttir

Guðrún var kjörin ungfrú Ísland árið 1962 og ári síðar bar hún sigur úr býtum í keppninni Miss International fyrst íslenskra kvenna. Guðrún starfaði árum saman sem fyrisæta og myndir af henni prýddu mörg helstu tímarit heims.

 

 

Hólmfríður Karlsdóttir

Íslenska þjóðin stóð á öndinni þegar Hólmfríður Karlsdóttir var krýnd ungfrú heimur árið 1985. Krýning hennar markaði upphafið að gullaldarárum íslenskra fegurðarsamkeppna og ekki leið á löngu þar til önnur fegurðardís hampaði sama titli.

 

 

Linda Pétursdóttir

Linda hlaut titilinn ungfrú heimur árið 1988. Linda fylgdist spennt með keppninni í gær og var ákaflega ánægð með árangur Unnar Birnu. "Þetta er glæsilegur sigur og eiginlega var kominn tími til að Ísland kæmist svona langt í keppninni þar sem við höfum ekki verið ofarlega á blaði undanfarin ár," sagði Linda sem átti auðvelt með að setja sig í spor Unnar Birnu. "Þetta er ofboðslega stórt allt saman og það eru líklega fáir sem skilja betur en ég hvernig henni Unni líður núna. Það er alveg ný veröld sem blasir við henni og hún á ábyggilega eftir að standa sig vel enda vel að sigrinum komin," segir Linda.