Sæll og glaður en þreyttur

Fjórtán hundruð kílómetra hjólreiðaferð Eggerts Skúlasonar til styrktar samtökunum Hjartaheill lauk síðdegis í gær þegar Eggert hjólaði síðasta spölinn til Reykjavíkur ásamt öðrum sem slógust í hópinn í Mosfellsbæ. Hann var þrjár vikur á ferð sinni um landið en víða slógust aðrir í för með honum stundakorn og gerði félagskapurinn ferðina bærilegri fyrir vikið. "Ég er afar ánægður með að hafa klárað þetta og þetta gekk alveg svakalega vel þó að veður og vindar hafi blásið gegn mér mest alla leiðina. Ánægðastur er ég með að hafa náð öllum þeim markmiðum sem ég setti mér í upphafi. Hjartaheill fengu góða kynningu og við sýndum að einstaklingur getur staðið upp og haft áhrif sé vilji til þess. Svo söfnuðum við talsverðum peningum og ég er sæll og glaður þó þreyttur sé." Eggert vildi koma á framfæri þakklæti og afsökunarbeiðni til þeirra bílstjóra sem töfðust þegar hann hjólaði síðasta spölinn en umferð gekk hægt á meðan milli Mosfellsbæjar og Reykjavíkur.