Bílabíó á miðbakkanum í kvöld

Bílabíó verður á miðbakkanum í Reykjavíkurhöfn í kvöld klukkan 21 í tengslum við Nordisk Panorama þar sem sýndar verða skemmtilegar norrænar stuttmyndir. Ætlunin var að bjóða upp á bílabíóið í gær en fresta varð sýningu vegna veðurs. Bílabíó var fundið upp í Ameríku til að auðvelda fjölskyldufólki að fara í bíó án þess að þurfa að setja börnin í pössun eða klæða sig upp. Aftur á móti varð þetta mjög vinsælt hjá unglingum sem notuðu tækifærið til að hittast og kela í bílunum á meðan á sýningu stóð. Frægt atriði er í kvikmyndinni Grease þar sem Danny, sem leikinn var af John Travolta, reynir að kela við Sandy, sem leikin var af Oliviu Newton John, og hún móðgast hrikalega, kýlir hann og stekkur á braut. Félagar þeirra hins vegar gamna sér í aftursætunum á bílunum allt í kring um þau á meðan Danny stendur eftir sorrí, svekktur og sár. Hins vegar er ekki hægt að ætla annað en að fólk sem sækir miðbakkann í kvöld muni skemmta sér vel og börnunum ætti ekki að vera kalt á náttfötunum í aftursætinu. Hvort hryggbrotnir piltar verði á sveimi er ekki hægt að segja til um.