Glókollur um borð í Ægi

Glókollur, minnsti fugl Evrópu, flaug inn um brúargluggann á varðskipinu Ægi í gærmorgun en ákvað svo að taka flugið til lands í gærkvöldi eftir góða dvöl um borð yfir daginn. Samkvæmt upplýsingum Ævars Petersens, forstöðumanns Reykjavíkurseturs Náttúrufræðistofunar Íslands, kemur glókollur upphaflega frá Evrópu en hann hóf að verpa hér á landi fyrir átta árum. Að sögn Ævars fóru þeir að verpa í skógræktarreitum víða um land og síðan hefur nánast orðið sprenging í útbreiðslu þeirra. Vart eru dæmi um að ný fuglategund hafi breiðst svo ört út hér á landi. Glókollur er minnsti fugl sem verpt hefur hér á landi, minni en músarindill, enda minnsti fugl Evrópu eins og áður segir. Hann vegur aðeins 5-6 grömm Á meðfylgjandi mynd, sem Jón Páll Ásgeirsson stýrimaður tók, má sjá fuglinn sem gerði sig heimakominn á Ægi.