Níu þúsund í Eyjum

Tæplega níu þúsund manns eru á Þjóðhátíð í Vestmannaeyjum. Lögregla er ánægð með framkomu gesta og segir enga kæru hafa verið lagða fram vegna líkamsárásar eða nauðgunar. Hins vegar hafa um 30 fíkniefnamál komið upp á hátíðinni.Gestirnir í Herjólfsdal vita að hverju þeir ganga. Í gær var kveikt í brennunni, í kvöld er flugeldasýningin og á morgun brekkusöngurinn. Lögregla segir um 9000 manns vera í dalnum. Allt hafi gengið friðsamlega fyrir sig. Hins vegar höfðu 30 fíkniefnamál komið til kasta lögreglu, öll minniháttar utan tvö. Í öðru þeirra var piltur tekinn með 40 grömm af amfetamíni, sem hann hefur játað að hafa ætlað að selja. Lögreglan hefur fundið mest af amfetamíni, en smáræði af e-töflum og hassi. Mikil eftirvænting ríkir í Vestmannaeyjum eftir tónleikum kvöldsins en þá vaknar Egó með Bubba Morthens af 20 ára dvala og tryllir lýðinn. Að þeim loknum leika Land og synir og Á móti sól fyrir dansi til morguns, en þær sveitir skipa ungir menn sem trítluðu um með bleyju þegar Egó hóf fyrst að trylla æskulýð þjóðarinnar.