Ávinningurínn um hálfur milljarður

Tilkoma Hvalfjarðarganga hefur ekki haft nein teljandi áhrif á vinnumarkað á Vesturlandi en ferðakostnaður einstaklinga á svæðinu hefur minnkað um allt að 31 prósent. Þetta er meðal þess sem fram kemur í nýrri skýrslu Samtaka sveitarfélaga á Vesturlandi sem kynnt var í gær. Meginniðurstöður skýrslunnar eru þær að göngin hafi komið Vesturlandi í sömu stöðu og Suðurland var fyrir opnun ganganna. Hafa samskipti Vestlendinga við íbúa höfuðborgarsvæðisins stóraukist. Þá leiðir rannsóknin í ljós að væntingar Vestlendinga til framtíðar Vesturlands hafi stóraukist eftir tilkomu ganganna. Heildarávinningur Vestlendinga af göngunum eru 503 milljónir króna á ári, þar af koma 394 milljónir í hlut Akurnesinga og nærsveitarmanna, 50 milljónir til íbúa Borgarfjarðar og Dalamenn og íbúar Snæfellsness deila jafnt með sér fjórtán milljónum á ári. Yfirleitt gildir að jákvæðra áhrifa ganganna gætir mest meðal þeirra Vestlendinga sem búa næst göngunum en síðan dregur úr þeim eftir því sem fjær dregur. Að sögn Vífils Karlssonar, hagfræðings og atvinnuráðgjafa Samtaka sveitarfélaga á Vesturlandi, mældist engin breyting á þróun meðallauna eða atvinnuleysis eftir tilkomu ganganna. "Það vekur hins vegar athygli að íbúar höfuðborgarsvæðisins hafa stóraukið sókn sína inn á vinnumarkað Vestlendinga, sérstaklega í hálaunastörf," segir Vífill. Hann bendir í þessu sambandi á stjórnendastöður á Grundartanga, kennarastöður á Bifröst og störf hjá Landmælingum á Akranesi. Vífill segir að jákvæð áhrif ganganna á vinnumarkaði séu fyrst og fremst fólgin í auknu atvinnuúrvali og atvinnuöryggi. "Þetta á einkum við um þá sem syðst búa. Okkar rannsóknir sýna að menn séu almennt reiðubúnir að aka 45 mínútur til vinnu og það styrkir bæði atvinnuúrval og atvinnuöryggi fyrir þá sem búa næst höfuðborginni," segir Vífill. Rannsóknin sem liggur skýrslunni til grundvallar hefur staðið yfir síðan haustið 2002 og var hún fjármögnuð af Samtökum sveitarfélaga á Vesturlandi, Vegagerðinni, Samgönguráðuneytinu og Byggðastofnun, auk þess sem Spölur, rekstaraðili Hvalfjarðarganga, lagði hönd á plóg.