Mótmæla sameiningu skólanna

Foreldrar barna í Húsabakkaskóla í Svarfaðardal mótmæla harðlega hugmyndum um að sameina skólann Dalvíkurskóla. Talsmaður foreldra segist ekki trúa því að af sameiningunni verði þegar málið hafi verið skoðað ofan í kjölinn. Dæmi séu um að fólk flytji í sveitarfélagið gagngert til þess að senda börn sín í Húsabakkaskóla. Á morgun verður tekin fyrir á sveitastjórnarfundi í Dalvík tillaga þess efnis að starfsemi Húsabakkaskóla verði færð til Dalvíkurskóla þar sem aðeins sex kílómetrar séu á milli sveitarfélaganna. Starfsmenn skólans og foreldrar barna í honum hafa mótnælt þessum hugmyndum kröftuglega og segja að þegar allt sé tekið með í reikninginn muni þessi tilfærsla skila tapi fyrir sveitarfélagið, en ekki fela í sér hagræðingu. Kolbrún Reynisdóttir, sem er í stjórn félags foreldra í Húsabakkaskóla, segir foreldra og íbúa í dalnum að sjálfsögðu mjög óhressa með stöðu mála. Félaginu sýnist sparnaðartölurnar sem lagðar séu til grundvallar vera byggðar á ákaflega veikum grunni og forsendurnar frekar takmarkaðar. Hún segir jafnframt ýmsa kostnaðarliði koma á móti lokuninni sem verði að skoða áður en ákvörðun er tekin, t.a.m. afleiðingar af töpuðum störfum innan sveitarfélagsins.