Bóndinn lagði sig í lífshættu

Friðgeir Karlsson, bóndi að Knerri á sunnanverðu Snæfellsnesi, lagði sig í lífshættu þegar hann bjargaði hátt í hundrað kindum út úr logandi fjárhúsum sínum í gærkvöldi áður en hann varð frá að hverfa og 600 lömb og kindur, sem eftir urðu í fjárhúsunum, brunnu þar inni. Friðgeir kallaði á aðstoð slökkviliðs laust fyrir klukkan átta í gærkvöldi og héldu slökkvilið Snæfellsbæjar og Grundarfjarðar þegar á vettvang. Þá logaði mikill eldur í öllum útihúsum og hávaðarok magnaði eldinn þannig að aðstæður allar voru ískyggilegar, að sögn Gísla Guðmundssonar, lögregluvarðstjóra í Snæfellsbæ. Hann segir fjárhúsin standa uppi enn að allt inni í þeim sé brunnið. Þak hlöðunnar, sem er steypt, er fallið og vélageymslan féll alveg saman. Gísli segir ofsaveður búið að vera á staðnum og að járn úr húsinu hafi fokið út um allt þannig að menn hafi verið í hættu. Hann segir að þó hafi tekist að bjarga íbúðarhúsinu frá tjóni. Gísli á ekki von á því að takist að slökkva alla loga í dag. Enn logar til að mynda í miklu heyi.