Majonesdós í bága við lög

Risastór majonesdós við vegkantinn í Villingaholtshreppi brýtur í bága við lög um náttúruvernd og byggingar að mati sýslumannsins á Selfossi. Skiptir þá engu hvort dósin er talin minnisvarði eða auglýsing fyrir majones. Sitt sýnist hverjum um majonesdósina sem stendur við þjóðveg eitt og því hefur starfsfólk sýslumannsembættisins fundið fyrir. Töluvert hefur verið um að fólk hringi til að tjá óánægju sína með framtak jarðareigandans sem jafnframt er eigandi Gunnars majones. Ólafur Helgi Kjartansson, sýslumaður á Selfossi, fullyrðir að dósin hafi verið sett upp í óleyfi. Það lítur því út fyrir að majonesdósin verði að víkja, hvort sem fólk lítur svo á að hér sé um að ræða skúlptúr, auglýsingu eða minnisvarða um íslenska sjoppumeningu. Dósin í Villingaholtshreppi er af þeirri stærðargráðu að bygganefnd svæðisins þarf að samþykkja hana. Lög um náttúruvernd, sem sýslumaður vísar í, kveða á um að leyfilegt sé að setja upp látlausar auglýsingar um atvinnurekstur á þeim stað þar sem slík starfsemi eða framleiðsla fer fram. Ólafur Helgi segir að þetta sé ekki látlaus auglýsing, burt séð frá því hvaða skoðun hann hafi á majonesi.