Rúmra tveggja ára hitatími

Hitinn í Reykjavík hefur nú verið fyrir ofan meðallag í 27 mánuði samfellt. Samkvæmt upplýsingum frá Veðurstofu Íslands mældist hitinn í júní 10,5 stig sem er 1,5 stigum ofan meðallags. Alls voru 199 sólskinsstundir í höfuðborginni í mánuðinum sem er um 38 stundum meira en í meðalári. Úrkoman var 10 prósent undir meðallagi. Tíðarfar í júní var annars hagstætt um allt land. Á Akureyri var meðalhitinn 9,2 stig sem er 0,8 stigum ofan meðallags. Sólskinsstundirnar á Akureyri voru 184 sem er sjö stundum meira en í meðalári. Úrkoman var um 32 prósentum undir meðallagi.