Flugturninum breytt í safn?

Það yrði menningarsögulegt stórslys ef gamli flugturninn á Reykjavíkurflugvelli yrði rifinn. Þetta segja breskir herflugmenn sem flugu á Íslandi á stríðsárunum. Þeir hvetja til þess að turninum verði breytt í safn.  Flugmálastjórn hefur fengið leyfi borgaryfirvalda í Reykjavík til að rífa gamla flugturninn og segir hann þurfa að víkja vegna þess að hann standi of nálægt flugbrautum. Það var breski herinn sem reisti turninn árið 1940 og þjónaði hann sem flugturn til ársins 1962. Í heimsókn íslenskra flugáhugamanna í klúbb breskra herflugmanna í London á dögunum lýstu gamlir flugmenn sem þjónuðu á Íslandi í Seinni heimsstyrjöld yfir áhyggjum sínum. Hugh Eccles, fyrrverandi flugsveitarforingi, segist telja að ef flugturninn verði rifinn sé þar með verið að kasta á glæ hluta af arfleifð Íslendinga sem væri stórslys. Þarna myndi þurrkast út staðfesting á þeim tengslum sem voru á milli konunglega flughersins og íslensku þjóðarinnar. Bent var á að úr þessum flugturni hefði orustunni um Atlantshaf í raun verið stjórnað. Turninn hefði því mikilvægt sögulegt gildi og hvetur Hugh Eccles til þess að þar verði komið upp safni. „Það er mikil saga fólgin í þeim flugsveitum sem störfuðu í Reykjavík. Ef turninn verður látinn standa sem safngripur, sem ég vona að verði, verður hann ekki bara tilfinningalega verðmætur fyrir menn eins og mig heldur fengjum við einstakt safn sem yrði helgað konunglega flughernum og íslensku þjóðinni,“ segir Eccles og bætir við að það myndi minna komandi kynslóðir á mikilvægt hlutverk í orustunni um Atlantshafið.