Óvíst hver rannsakar málið

Ríkissaksóknari ákveður innan stundar hvaða lögregluembætti verður falið að rannsaka tildrög þess að þrjátíu og þriggja ára karlmaður lést í Keflavík síðdegis í gær eftir snörp átök við lögreglumenn þar. Það var klukkan rúmlega fimm síðdegis að lögreglunni var tilkynnt um mann sem væri illa á sig kominn úti á götu í Keflavík. Hann virtist vera í annarlegu ástandi og var fluttur á lögreglustöðina . Hringt var heim til hans þar sem sonur hans kom í símann og eftir það samtal þótti ástæða til að lögregla kannaði nánar ástand á heimilinu. Þegar tveir lögreglumenn komu þangað kom sonurinn út á lóð til móts við lögregluna, var æstur, árásargjarn, óljós í tali og hafði í hótunum að sögn lögreglu. Upphófust mikil átök og voru tveir lögreglumenn til viðbótar kallaðir á vettvang, að sögn vitna, en þegar lögregla náði loks tökum á honum og náði að handjárna hann, varð maðurinn skyndilega mjög veikur og missti meðvitund. Lögreglan kallaði þegar á sjúkrabíl og hóf lífgunartilraunir en þær báru ekki árangur. Þegar þarna var komið sögu voru læknir og prestur kallaðir á lögreglustöðina til að aðstoða föðurinn, sem er liðlega sextugur. Ekki fæst uppgefið hvort áverkar sáust á honum þegar hann var tekinn úr umferð né hvort áverkar sáust á syninum áður en til átaka við lögregluna kom. Það er því með öllu óljóst hvers vegna lögregla taldi ástæðu til að fara heim til sonarins eftir símtal við hann, jafnvel þótt hann hafi virst í annarlegu ástandi. Að sögn nágranna sonarins átti hann við geðræn vandamál að stríða en þeir töldu aldrei neina ógn stafa af honum og óttuðust ekki heldur um börn sín í návist hans, þótt hann væri stór og þrekvaxinn. Lögreglumenn frá tæknideild Lögreglunnar í Reykjavík og Ríkislögreglustjóra voru kallaðir á vettvang og voru þar við störf fram á nótt að sögn nágranna. Keflavíkurlögreglan sendi Ríkissaksóknara öll gögn í morgun en hann tekur ákvörðun um hvaða lögregluembætti verður falin rannsóknin þar sem Keflavíkurlögreglan getur það ekki vegna málsatvika. Ákvörðun um það liggur fyrir innan stundar. Eftir því sem fréttstofan kemst næst er faðirinn enn undir eftirliti lækna