ILO gagnrýnir stjórnvöld

Þing Alþjóðavinnumálastofnunarinnar, ILO, hefur staðfest niðurstöðu Félagafrelsisnefndar vegna kæru ASÍ um endurtekin afskipti stjórnvalda af gerð kjarasamninga. Kæran fólst í að lög á verkfall sjómanna vorið 2001 brytu gegn grundvallarsamþykktum ILO og þjóðréttarlegum skuldbindingum Íslands. "Í þessari ákvörðun ILO-þingsins felst mjög alvarleg gagnrýni á ríkisstjórn Íslands. Maður skyldi ætla að þegar íslenska ríkisstjórnin er gagnrýnd á alþjóðavettvangi, sem gerist ekki oft sem betur fer, hafi það þau áhrif að hún hugsi sig um áður en hún skiptir sér af gerð kjarasamninga með lagasetningu," segir Magnús M. Norðdahl, lögfræðingur ASÍ. Árni Mathiesen sjávarútvegsráðherra segir að hin raunverulega gagnrýni sé á samningsaðilana. "Að þeir skuli ekki hafa náð samningum í áraraðir er nánast einsdæmi, allar aðrar atvinnugreinar á íslandi hafa náð að semja sín á milli nema sjómenn og útvegsmenn. Verkfallið 2001 stóð í sex vikur áður en Alþingi greip inn í. Það var tvöfalt lengra en áður hefur verið og sýnir hversu treg við vorum að grípa inn í þessa deilu. Þetta undirstrikar nauðsyn þess að þessir aðilar semji sín á milli og hætti að treysta því að stjórnvöld skeri þá niður úr snörunni þegar þeir klúðra samningum sínum," segir Árni. Að sögn Magnúsar er um að ræða brot á tveimur mikilvægustu grundvallarsamþykktum ILO, en það eru samþykktir 87 og 98 sem fjalla um réttinn til þess að gera frjálsa kjarasamninga, verkföll og verkbönn og réttinn til þess að stofna og eiga aðild að verkalýðsfélögum og félögum atvinnurekenda.