Einn sendibílsfarmur seldur

Stóru tónlistarútgáfunum datt ekki til hugar að gefa út hljómdisk með íslenskri reggítónlist fyrir jólin og höfnuðu tilboði um slíkt, enda galin hugmynd. Að minnsta kosti einn lítill sendibílsfarmur af slíkum diski hefur engu að síður selst. Hljómsveitin Hjálmar hefur verið að fá þessa líka fínu dóma fyrir plötuna sem ber nafnið „Hljóðlega af stað“. Þetta byrjaði á því að hljómsveitin tók upp eitt reggílag með Rúnari Júlíussyni og eftir það varð ekki aftur snúið. Reggítónlistin hefur hingað til passað betur í hitanum á Jamaíka en hvernig passar hún á Íslandi? Sigurður H. Guðmundsson og Guðmundur Kr. Jónsson, meðliðmir Hjálma, segja hana virka vel hér á landi - í það minnsta hafi þeir heyrt af mörgum sem ylji sér við hana. Þeir segja jákvæðan anda einkenna lagasmíðar og textarnir eru fullir gleði og hamingju. Útgefendur voru ekki sannfærðir um að þetta myndi seljast og höfnuðu piltunum þegar þeir leituðu til þeirra. Geimsteinn, útgáfufyrirtæki Rúnars Júlíussonar, gefur diskinn því út og viðtökurnar hafa verið góðar. Salan er kannski ekki í vörubílaförmum en er komin upp í u.þ.b. lítinn sendiferðabíl að sögn Sigurðar og Guðmundar. Þeir sem vilja hlusta á Hjálma geta gert það í Loftkastalanum á fimmtudagskvöld þar sem þeir munu spila ásamt KK.