Íslenskir unglingar á réttri leið

Dregið hefur meira úr reykingum og drykkju ungmenna hér á landi en í öðrum Evrópulöndum. Þetta kemur fram í skýrslu Evrópuráðsins um vímuefnaneyslu unglinga. Sama könnun sýnir að notkun á sniffefnum hefur aukist jafnt og þétt hér á landi. Könnunin var gerð í 35 löndum og náði til um hundrað þúsund ungmenna, þar á meðal allra Íslendinga í aldurshópnum 15-16 ára. Niðurstöðurnar sýna að íslenskir unglingar standa sig vel þegar á heildina er litið. Til dæmis hefur stórlega dregið úr reykingum. Átján prósent íslensku unglinganna sögðust hafa reykt sígarettur fjörutíu sinnum eða oftar. Svarhlutfallið var hæst í Austurríki eða 42 prósent. Fjórtán prósent íslenskra unglinga sögðust hafa drukkið áfengi fjörutíu sinnum eða oftar. Dregið hefur orðið úr neyslunni hér á landi síðustu ár á sama tíma og hún hefur aukist víða í Austur-Evrópulöndum. Danskir unglingar koma verst út í þessum lið könnunarinnar. Þórólfur Þórlindsson, prófessor við Háskóla Íslands, segir ljóst að Íslendingar séu á réttri leið í forvarnarmálum og að öflugt starf sem hófst árið 1998 sé farið að skila árangri. Áherslan hefur verið á að draga úr neyslunni í elstu bekkjum grunnskóla því þeir árgangar sem eru lágir í 10. bekk eru lágir áfram að sögn Þórlinds, og á það sérstaklega við um reykingar.  Það kveður við annan tón þegar litið er á tölur um neyslu ólögreglegra vímuefna. Fjögur prósent íslenska stráka og stelpna sögðust hafa reykt hass á síðustu 30 dögum. Til viðmiðunar má geta þess að hlutfallið var eitt prósent í Svíþjóð og tuttugu og þrjú prósent á Spáni. Tólf prósent íslensku ungmennanna sögðust hafa notað sniffefni en það er mun hærra hlutfall en annars staðar Norðurlöndum. Til dæmis svöruðu einungis fimm prósent norskra unglinga spurningunni játandi. Þórlindur telur ástæðu til að hafa áhyggjur af þessari aukningu, sérstaklega í ljósi þess að sölumenn eiturlyfja eru sífellt að verða aðgangsharðari.