Borgin sker niður framlög

Tónlistarskólar í Reykjavík horfa fram á mikinn rekstrarvanda auki Reykjavíkurborg ekki fjárframlög sín til þeirra að sögn Sigursveins Kr. Magnússonar, formanns Samtaka tónlistarskóla í Reykjavík. Sigursveinn hefur í bréfi til borgaryfirvalda óskað eftir viðræðum vegna þessa. Borgarráð vísaði málinu í gær til meðferðar fræðsluráðs. "Borgin hefur skorið niður fjárframlög til skólanna," segir Sigursveinn. "Í fjárhagsáætlun hefur borgin ekki gert ráð fyrir stofnun nýrra skóla. En tilkoma þeirra hefur orðið til þess að framlög til þeirra sem fyrir eru hafa lækkað. En enn mikilvægara er að túlkun borgarinnar á kjarasamningum hefur orðið til þess að skólarnir hafa ekki fengið aukið fé til að standa straum af kostnaði vegna hækkunar launa tónlistarkennara. Skilaboðin sem við höfum fengið eru mjög óskýr en við túlkum þau þannig að okkur sé ætlað að hagræða." Sigursveinn segir að það verði ekki gert nema fækka nemendum og draga saman kennslu. Það sé þvert á stefnu borgaryfirvalda um að eyða biðlistum eftir tónlistarnámi í borginni.