Milljónir tonna af sandi fuku

Það tekur náttúruna að minnsta kosti fimm ár að vinna upp þá landeyðingu sem varð í ofsarokinu í byrjun vikunnar, þegar milljónir tonna af sandi fuku yfir landið. Svörðurinn er nú sérstaklega viðkvæmur fyrir öðrum eins veðurofsa, og óskar landgræðslustjóri sér nú helst af öllu mikillar snjókomu til að vernda landið. Baráttu Landgræðslunnar við landfok má líkja við stríð. Fyrir tuttugu árum leit út fyrir að það stríð væri tapað, og svona rofabörð eins og þessi mátti sjá víða. Á síðustu árum hefur taflið snúist við. Nú er meira land grætt en fýkur burt. Í hvassviðrinu í byrjun vikunnar fuku hinsvegar milljónir tonna af sandi og mold af hálendinu gróin svæði, og er þetta mesti uppblástur síðustu 15 árin. Miklir sandskaflar mynduðust við Heklurætur, þar sem þó nokkur trjágróður vex. Landgræðslan er byrjuð að kanna afleiðingarnar. Það er ljóst að þúsundir hektara af gróðri hafa skaðast í rokinu. Sveinn Runólfsson, landgræðslustjóri segir að það land sem hafi verið gróa upp undanfarin ár hafi farið verst. Það sé mjög slæmt að missa þann gróður og það setji baráttuna til baka um nokkur ár. Sveinn telur að það myndi taka náttúruna að minnsta kosti fimm ár að vinna upp þá landeyðingu sem varð í rokinu í vikunni. Hann segir að mikinn snjó þurfi til að vernda gróðurinn fram á vor og komi þá gott veður muni gróðurinn ná sér á nýjan leik.