Landeigendur unnu
Ríkið beið ósigur í Hæstarétti í dag þegar staðfest var að land innan tiltekinna jarða í Árnessýslu teldust ekki til þjóðlendna, eins og ríkið krafðist. Landeigendur segja langri og erfiðri baráttu þar með lokið. Lögmaður landeigenda segir dóminn fela í sér skilaboð til ríkisins um að gæta hófs í kröfum sínum. Í þessu máli var í raun tekist á um hvar draga eigi mörkin á milli eignarlands og þjóðlendna. Ríkið hafði gert kröfu um að hluti eignarjarða bænda í Biskupstungum skildi gerður að þjóðlendum og þar með tekin af bændum og gerður að almenningseign. Þessari kröfu hafnaði Hæstiréttur. Ennfremur segir Hæstiréttur að bæði Framafréttur og afréttur norðan vatna skuli teljast til þjóðlendna jafnframt vera afréttur Biskupstungnahrepps og er hvoru tveggja í samræmi við úrskurð Óbyggðanefndar. Ólafur Björnsson, hæstaréttarlögmaður segist fagna niðurstöðunni fyrir hönd landeigendanna, enda séu jarðirnarmetnar sem eignarland og ekki fallist á þjóðlendukröfur ríkisins. Ragnar Aðalsteinsson var annar lögmaður landeigenda. Hann segir dóminn fordæmisgefandi og nánast einhlítt að ríkið muni breyta kröfum sínum í þeim málum sem þegar er verið að reka. Hann segir skilaboðin þau að ríkinu beri að sína meiri hófsemi en hingað til hafi verið gert. Björn Sigurðsson í Úthlíð segir að sér líða líklega eins og sigurvegurum sex daga stríðsins, nema í þessu tilviki sé um sex ára stríð að ræða. Björn segir að aleiga landeiganda sé falin í jörðum þeirra og að þeir eyði oft á tíðum lunganum úr ævinni við að eignast jarðirnar. Hann segist hafa rembst við að borga af lánum í 40 ár og sér hefði þótt hart að ríkisvaldið hefði komið eftir allt þetta ströggl og sagt við sig að hann ætti ekki landið. Ólafur Björnsson segir þennan dóm vera mikinn sigur fyrir starf Óbyggðanefndar. nefndinni hafi verið gefið aukið vægi og nú sé búið að leggja línu í málinu og ríkið hljóti nú að draga úr kröfum sínum. Sif Guðjónsdóttir, skrifstofustjóri óbyggðanefndar segir að í dómnum felsist viðurkenning Hæstaréttar á því að forsendur óbyggðanefndar fái í megindráttum staðist.
