Milljarða framkvæmdir í hættu?

Óttast er að grjóthrun hafi stíflað hjárennslisgöng fram hjá virkjanaframkvæmdunum við Kárahnjúka þannig að milljarða framkvæmdir gætu verið í hættu. Göngin voru grafin inn í gljúfurvegginn ofan við vinnusvæðið við aðalstífluna og opnast svo neðan við vinnusvæðið. Þau eiga að veita vatni fram hjá endanlegu stíflumannvirki á meðan það er í byggingu og myndaðist stórt lón ofan við göngin í gærkvöldi við bráðabirgðastíflugarð sem á að beina rennslinu inn í göngin og verja vinnusvæðið við aðalstífluna vatnsaga. Vinna hófst aftur í morgun við að hækka og styrkja bráðabirgðastífluna. Þar er fjölmennt vinnusvæði en gripið var til þessa ráðs um helgina þegar vatn hlóðst óeðlilega mikið upp ofan við gangamunnann. Nú er jafnvel rætt um að hækka stífluna um heila sex metra og breikka hana í réttu hlutfalli við það. Vöxtur hljóp í Jökulsá á Dal síðdegis í gær og um klukkan hálf sjö var brúnni við Fremri- Kárahnjúk lokað enda var vatnsyfirborðið þá alveg að ná upp í brúargólfið og farið var að skola úr fyllingum við brúarendana. Vinnusvæðið var þó ekki einangrað því hægt er að komast að því upp með ánni hinumegin. Flóðið hefur sjatnað verulega í nótt en áfram er spáð hlýindum og væntanlega mikill bráðnun þannig að rennslið getur aukist á ný með kvöldinu. Svo virðist sem ummál hjáveituganganna sé of lítið til að anna vatnsrennslinu í flóðum, eins og fram kom í hádegisfréttum Bylgjunnar í gær, eða þá að einhverskonar stífla sé í göngunum líkt og jafnvel er óttast um núna. Við því er lítið eða ekkert að gera því ekki er lengur hægt að veita vatninu annað á meðan viðgerð yrði framkvæmd. Ómar R. Valdimarsson, upplýsingafulltrúi ítalska verktakans Impregilo, sagði í viðtali við fréttastofuna í morgun að samkvæmt áætlunum sem upphaflega voru lagðar fyrir verktakann hafi þvermál ganganna átt að vera sex metrar. Verktakinn hafi hins vegar ekki talið það nægilega öruggt og fengið því framgengt að þvermálið var aukið í níu metra, en allt kemur fyrir ekki.