Vítamíndropar taldir valda ofnæmi

Eftir að ungabarn hafði fengið bráðaofnæmi fyrir jarðhnetum voru innkalllaðir vítamíndropar sem innihalda jarðhnetuolíu. Björn Árdal, sérfræðingur í ofnæmis- og ónæmissjúkdómum, sagði grun leika á að jarðhnetuolían í A- og D-vítamíndropunum hefði verið uppspretta af jarðhnetuprótínum, sem valdið gætu ofnæmi. Lyfjastofnun innkallaði dropana, sem voru framleiddir í Danmörku, í fyrra vegna skorts á upplýsingum á merkimiðum á þeim þar sem láðst hefði að tilgreina jarðhnetuolíu sem burðarefni A- og D-vítamíns í þeim. Þá lék grunur á að tilfelli af hnetuofnæmi hefði komið fram hjá ungabarni hér á landi vegna notkunar á dropunum. "Menn hafa fundið þetta ofnæmi í vaxandi mæli," sagði Björn. "Það stafar vafalaust meðal annars af breyttum matarvenjum. Ég tel, að einstaklingum með jarðhnetuofnæmi hafi fjölgað," sagði Björn, en undirstrikaði að engar tölur lægju fyrir. Hann sagði að gera þyrfti umfangsmikla rannsókn til að finna út tíðni þess. Sjálfur kvaðst hann giska á að stór munur væri á tíðni þess í aldursflokkunum fæddum 1960-1980 og 1981til dagsins í dag. Hann sagði jafnframt, að sá sem hefði ofnæmi fyrir jarðhnetum mætti ekki setja agnarögn af þeim inn fyrir sínar varir. Ella getur viðkomandi fengið einkenni eða allt upp í ofnæmislost. Þá gæti hann átt í öndunarerfiðleikum, fallið í blóðþrýstingi og lífshættulegt ástand gæti skapast. "Við höfum séð svæsin einkenni en sem betur fer aldrei séð dauðsfall," sagði Björn. "Þó að vissir einstaklingar séu útsettir fyrir jarðhnetum þá eru örfáir sem mynda ofnæmi," sagði hann ennfremur. "En menn töldu, þegar það kom upp, að jarðhnetuolía væri í vítamíndropunum, að betra væri að losa sig við hana. Það er grunur um, að hún hafi getað ræst ofnæmisviðbrögð fyrir jarðhnetum." Björn sagði að foreldrar barna sem væru haldin jarðhnetuofnæmi væru með neyðarsprautu til taks. Í henni væri adrenalín. "Þetta á fyrst og fremst við um jarðhnetuofnæmið," sagði hann, "af því að það er hvað svæsnast."