Morðvopnið hjá líkinu í gjótunni

Lögregla fann í dag kúbein sem talið er að Hákon Eydal hafi notað til að myrða Sri Ramawati. Það lá í sömu gjótu og líkið af henni sem fannst í Hafnarfjarðarhrauni í gær.  Rannsóknin á hvarfi Sri, sem hefur staðið í mánuð, hefur tekið á sig ólíklegustu myndir. Fyrrverandi sambýlismaður hennar, Hákon Eydal, sem verið hefur í haldi lögreglu í tæpan mánuð, þagði fyrst þunnu hljóði um afdrif Sri í þrjár vikur. Í síðustu viku losnaði svo um málbeinið. Fyrst upplýsti Hákon að hann hefði hent líkinu af henni í sjóinn við Hofsvík á Kjalarnesi og daginn eftir viðurkenndi hann að hafa banað Sri með barefli og sett líkið af henni í stóran drapplitaðan póstpoka frá sænsku póstþjónustunni. Eftir árangurslausa leit í Kollafirði og nágrenni fór lögregla að hallast að því að saga Hákons um afdrif líksins væri uppspuni og í gær sagði Hákon þeim nýja sögu, um að líkið væri falið í Hafnarfjarðarhrauni. Sú saga reyndist sönn. Í gjótu, miðja vegu milli Slunkaríkis og Fjárborgarinnar í hrauninu, fann lögregla líkið um kvöldmatarleytið í gær. Tæknideild lögreglu var að störfum við gjótuna í dag og fann þá kúbein í gjótunni sem talið er að Hákon hafi notað til að veita Sri þá áverka sem leiddu til dauða hennar. Ómar Smári Ármannsson aðstoðaryfirlögregluþjónn segir að Hákon hafi farið með líkið af Sri út í hraunið um miðbik sunnudagsins, en hann myrti hana að morgni dags. Það verður að telja nokkra fífldirfsku að koma líki fyrir á þessum stað á miðjum frídegi því nokkuð er um að fólk fari í gönguferðir á þessu svæði. Til að mynda mætti fréttamaður manni og hundi í göngutúr um hraunið í dag. Ómar Smári segir að líkið hafi hins vegar verið mjög vel hulið grjóti og því hefði verið afar erfitt að finna það án hjálpar þess sem kom því þar fyrir. Hákon hefur ekki verið yfirheyrður í dag en rannsókn málsins heldur áfram.