Uppsetning vinnubúða hafin

Akrafell, skip Samskipa, kom til Reyðarfjarðar á mánudag með fyrsta hluta vöruflutninga sem félagið annast fyrir Fjarðaál vegna uppsetningar vinnubúða fyrir álversuppbygginguna eystra. Alls er um að ræða flutning á yfir 900 einingum af vinnubúðum, bæði skrifstofum og svefnskálum ásamt ýmis konar fylgihlutum, sem reistar verða á Reyðarfirði í tengslum við byggingu álversins. Vinnubúðirnar eru framleiddar í Búdapest. Fram kemur í tilkynningu frá Samskipum að félagið hafi séð um flutning á vinnubúðunum frá Ungverjalandi til Rotterdam og þaðan til Íslands. Næsta sending er væntanleg til Reyðarfjarðar á þriðjudag með Skaftafelli og verður henni skipað um borð í Rotterdam á föstudaginn kemur. Í tilkynningunni segir jafnframt að flutningar vegna uppbyggingar Fjarðaáls verði þeir mestu í Íslandssögunni og hefjist þeir af fullum krafti á næsta ári.