Fugladráp á þjóðvegum

Virðingarleysi við umhverfið sést á dauðum fuglum við þjóðvegi landsins. Árekstur fugla við bifreiðar er þriðja stærsta orsök dauða þeirra. Ungar verða helst fyrir bílum. Það hefur minni áhrif á stofnstærð en ef keyrt væri á eldri fugla Árekstur við bíla er þriðja stærsta orsök fugladauða á eftir girðingum og raflínum, segir Jóhann Óli Hilmarsson, formaður Fuglaverndarfélags Íslands. Borgþór S. Kjærnested, leiðsögumaður og túlkur, segir fugladráp á þjóðvegum landsins virðingarleysi við umhverfið. "Mér finnst það landlægur ósiður að geta ekki sýnt umhverfinu smá tillitsemi. Það er eins og maður eigi að vera einn á þjóðvegunum. Ég held að það tíðkist hvergi í heiminum svona framkoma," segir Borgþór. Hann ferðast mikið um landið vegna vinnu sinnar, þó mest um Suðurlandið og segir hvergi eins marga dauða fugla á vegum og á Vatnsleysuströnd. Jóhann Óli segir fugladauða algengastan í júlí. Ekki sé aðeins keyrt á kríu heldur alla mófugla. "Það stafar af því að ungarnir eru núna að verða fleygir og það eru fyrst og fremst þeir sem lenda í þessu. Afföll af ungum fyrsta árið og veturinn eru mikil þannig og það hefur minni áhrif á stofninn heldur en ef þetta væru fullorðnir fuglar," segir Jóhann. Hann segir kríu sækja í að sitja á möl, sérstaklega síðsumars. "Þetta er einhvað í eðli hennar. Hún er svo stuttfætt og vill þá sitja á einhverju svona sléttu eins og sandi og möl." Jóhann segir erfitt að eiga við þetta því fuglarnir fljúgi upp á móti vindi og ef vindstefnan sé þannig fljúgi þeir beint framan á bíla. "Ef fólk er að keyra í gegnum varp þá á það að sjálfsögðu að hægja á sér. Það er almenn skynsemi." Borgþór bendir á að í vegkantinum á Vatnsleysuströnd séu skilti sem vari við fuglamergðinni en í 90% tilvika virðist sem fólk sé ólæst á þau. "Ég hélt að fólki fyndist það frekar leiðinlegt að keyra á lifandi hluti," segir Borgþór: "Ég vona að fólk reyni að temja sér virðingu við umhverfi sitt."