Verð sjávarafurða hækkar

Verð sjávarafurða var hærra í september en í ágúst síðastliðnum samkvæmt verðvísitölu sjávarafurða sem Hagstofan birti í morgun. Verð sjávarfurða reiknað í íslenskum krónum hækkaði um tæpt eitt prósent á tímabilinu, þrátt fyrir sterkari krónu í september í ár en á sama tíma í fyrra. Frá þessu greinir í Vegvísi greiningardeildar Landsbankans. Á síðustu tólf mánuðum hefur verðmæti sjávarafurða þó lækkað um tæp tvö prósent enda hefur krónan styrkst um rúm þrjú prósent frá því í lok september í fyrra. Þegar horft er til tólf mánaða breytinga hefur verðmæti sjávarafurða lækkað allt frá því í maí 2002 og er það í samræmi við styrkingu krónunnar að sögn Landsbankans.