Samningur um lækkun lyfjaverðs

Heilbrigðisráðherra hefur gert samning við fulltrúa lyfjaframleiðenda innan Félags stórkaupmanna um að lækka lyfjaverð til samræmis við verð annars staðar á Norðurlöndum. Stefnt er að því að lyfjaverð hér á landi verði sambærilegt við meðalverð á Norðurlöndunum innan tveggja ára. Fyrsta lækkun samkvæmt samkomulagi sem samsvarar 200 milljón króna lækkun á ársgrundvelli kemur til framkvæmda 1. september næstkomandi. Þeir hlutar reglugerðar sem áttu að taka gildi 1. ágúst næstkomandi og fjalla um viðmiðunarverð lyfja með sambærileg meðferðaráhrif verða felldir niður. Þá hefur ráðherra fallist á að skipa sérstakan samráðshóp sem verður ráðherra og lyfjaverðsnefnd til ráðgjafar um lyfjaverð og nánari útfærslu og framkvæmd samkomulagsins. Í kvöldfréttum ríkisútvarpsins sagði heilbrigðisráðherrann samninginn stóran áfanga í lækkun lyfjaverðs hér á landi hann hafi sagt það í vor þegar reglugerð um viðmiðunarverð lyfja hafi verið frestað að hann vildi freista þess að ná árangri í lækkun lyfjaverðs. Það hafi tekist og hann sé mjög ánægður með þann samstarfsvilja sem komið hafi fram hjá félagi íslenskra stórkaupmanna. Hann segir þó enn nokkuð í land að ná þeim sparnaði sem þyrfti til að mynda hjá Tryggingastofnun ríkisins. Það sé erfitt því lyfjapakkinn í heild hafi hækkað vegna nýrra og dýrari lyfja og aukinnar lyfjanotkunar