Bush úr öpum

List eða áróður er spurningin og forsvarsmenn listasafns í New York borg voru ekki lengi að komast að niðurstöðu. Í Chelsea market var opnuð sýning listamannsins Christopher Savido þar sem meðal annars gat að líta andlitsmynd af Bush Bandaríkjaforseta. Einn stjórnarmanna listasafnsins rýndi vel í verkið og sá að andlitið var myndað með fjölda lítilla mynda af öpum. Það líkaði honum lítt og krafðist þess að sýningunni yrði lokað þegar í stað, sem var og gert. Sextíu myndir Savidos voru teknar niður, mánuði fyrr en til stóð.