Flóttafólk og ofsóknir

Málefni flóttafólks og hælisleitenda verða rædd á opnu málþingi sem Mannréttindaskrifstofa Íslands, í samvinnu við Rauða kross Íslands, efnir til milli klukkan tólf og hálf tvö í dag í Norræna húsinu. Á þinginu verða ræddar alþjóðlegar reglur um hælisleitendur og meðferð mála þeirra með sérstöku tilliti til flóttamannasamnings Sameinuðu þjóðanna. Þá verður einnig snert sérstaklega á málefnum kvenna sem flýja kynbundnar ofsóknir. Málþingið er öllum opið og aðgangur ókeypis. Frummælendur eru fjórir, en Guðrún D. Guðmundsdóttir, framkvæmdastjóri Mannréttindaskrifstofu, stýrir fundinum.