Köttur fékk MBA-gráðu

Colan Nolby er kominn með MBA-gráðu án þess að hafa nokkurn tíma gengið í skóla. Colan er sex ára köttur í eigu rannsóknarlögreglumanns í Harrisburg í Pennsylvaníu. Yfirvöld í Pennsylvaníu grunaði að lítið stæði á bak við gráður sem Trinity Southern-háskólinn í Texas gæfi út. Lögreglumaðurinn setti sig því í samband við skólann og keypti gráðu á átján þúsund krónur. Hann sagði Colan Nolby hafa reynslu af barnagæslu og innkaupastjórnun en tók ekki fram að Colan væri köttur. Þetta dugði kettinum til prófgráðu og einkunna. Tveir bræður sem standa að skólanum hafa verið ákærðir fyrir svindl.