Jón Ásgeir fjórði á lista yfir áhrifamenn í breskum tískuiðnaði

Jón Ásgeir Jóhannesson forstjóri Baugs Group er í fjórða sæti á lista yfir hundrað áhrifamestu menn í tískuiðnaði í Bretlandi, samkvæmt áliti vikuritsins Drapers Record sem birt er í nýjasta hefti þess. Jón Ásgeir er ennfremur einn af hástökkvurnum á lista Drapers Record, stekkur up um heil 47 sæti frá síðustu könnun. Efst á lista Drapers Record trónir Philip Green athafnamaður og eigandi Arcadia og BhS, í öðru sæti er Stuart Rose forstjóri Marks & Spencer og í því þriðja Simon Wolfson forstjóri Next. Drapers rifjar upp í umfjöllun sinni nú að það hafi hvatt fólk til að fylgjast með Jóni Ásgeiri. "Árið hefur verið viðburðaríkt hjá Baugsmönnum. Í júlí bættust Karen Millen og Whistles í tískuveldi Baugs fyrir litlar 120 milljónir punda og í sömu viku keyptu þeir 20% hlut í The Shoe Studio Group skófyrirtækinu," segir í grein Drapers Record. Þá segir að útlit sé fyrir öran vöxt hjá Mosaic, fatafyrirtæki Baugs en undir þeim hatti eru Oasis, Coast, Whistles og Karen Millen. Í greininni segir að Baugur hafi í síðasta mánuði keypt Mk One en jafnframt selt eignir, svo sem 10,5% hlut í House of Frasier með dágóðum hagnaði. "Þessi viðskipti eru aðeins í fatageiranum, annars staðar í smásölugeiranum er Baugur að eltast við Big Food Group. Langar okkur ekki öll vita hvað er á innkaupalista Jóns Ásgeirs á næsta ári?" spyr greinarhöfundur Drapers Record.