Staðan óeðlileg

Forsvarsmenn Íslandsbanka telja óeðlilegt að Íbúðalánasjóður, sem nýtur ríkisábyrgðar, stjórni samkeppni á íbúðalánamarkaði með því að rifta samstarfssamningi við bankana um greiðslumat íbúðalána. Samstarfssamningur Íbúðalánasjóðs og viðskiptabankanna um greiðslumat rennur út í þessum mánuði. Íbúðalánasjóður ætlar hins vegar, ásamt sparisjóðunum og SPRON, að gera þeim, sem standa í húsnæðiskaupum, kleift að framkvæma greiðslumat, sem áður var gert í bönkum og sparisjóðum. Sparisjóðirnir ætla þannig að bjóða upp á allt að 25 milljóna króna lán, á 4,15 prósenta vöxtum, en ekki verður gerð krafa um viðskipti við sparisjóðina. Innan bankakerfisins heyrast þær raddir að með þessum breytingum séu sparisjóðirnir að stökkva undir pilsfaldinn hjá Íbúðalánasjóði, þar sem þeir geti ekki, vegna smæðar sinnar, staðið einir undir þeim skuldbindingum sem þessu fylgi. Telja menn óeðlilegt að viðskiptabönkunum sé stillt upp við vegg með þessum hætti, og segja það hagkvæmast fyrir þjóðfélagið að breið samstaða ríkti um fyrirkomulagið í þessum efnum. KB-banki og Landsbankinn eru að skoða leiðir til þess að bregðast við breytingunum. Forsvarsmenn Íslandsbanka segjast ekki átta sig á þessu nýja útspili íbúðalánasjóðs. Jón Þórisson, aðstoðarforstjóri Íslandsbanka, segir bankana um langt árabil hafa annast þetta greiðslumat. Þegar komi að þjónustu Íbúðalánasjóðs sé það mikilvægt fyrir fólk að það hafi aðgang að fjölbreyttri þjónustu og slíkt hafi verið tryggt með samstarfi við bankana. Hjá Íslandsbanka hafi verið lagður metnaður í að gera þetta sem best úr garði og því verði leitað skýringa á því hvort menn telji að svo hafi ekki verið. Hjá Íslandsbanka er verið að skoða kosti þess að ganga inn í samstarf íbúðalánasjóðs og sparisjóðanna. Aðstoðarforstjóri bankans segir það skipta höfuðmáli að fólk hafi um margar leiðir að velja þegar komi að húsnæðiskaupum og langbest sé að fjármögnun sé á hendi eins aðila. Jón segir samkeppnina leidda af Íbúðalánasjóði, sem sé í eigu ríkisins og hafi því möguleika á allt öðrum kjörum en aðrir, eins og til dæmis bankarnir. Ekki hafi enn verið til lykta leitt hvort staða Íbúðalánasjóðs á markaðnum sé í lagi.