Ætlum að vinna riðilinn

Keflvíkingar mæta Bakken Bears í Bikarkeppni Evrópu í körfuknattleik í Árósum í kvöld. Bakken Bears er nýbakaður bikarmeistari í dönsku deildinni og er eina liðið sem hefur náð að sigra Keflavík fram að þessu í Evrópukeppninni. Sá leikur fór fram á heimavelli Keflvíkinga og þar náðu gestirnir að knýja fram sigur, 80-81, eftir að hafa verið undir megnið af leiknum. Með sigri í leiknum hefðu Keflvíkingar haft afar vænlega stöðu fyrir útileikjahrinu liðsins sem nú stendur yfir. Sigurður Ingimundarson, þjálfari Keflavíkurliðsins, sagði lið sitt ætla að hefna fyrir leikinn í Keflavík. "Og rúmlega það," sagði Sigurður. "Í þeim leik vorum við óheppnir og lélegir í bland og þurfum að laga ýmislegt sem fór forgörðum þar. Við þurfum t.d. að spila betri sóknarleik en við gerðum heima. Þar var hann ekki nógu góður og við verðum að vera markvissari í okkar aðgerðum." Að sögn Sigurðar verður í mörg horn að líta fyrir leikmenn Keflavíkur gegn Bears-liðinu og þó svo að "stóri maðurinn" í liði Bears, Chris Christoffersen, hafi verið drjúgur í síðasta leik, sé megináherslan lögð á aðra menn sem eru skæðir sóknarmenn. "Chris mun skora sín stig gegn okkur þannig að við höfum engar stórar áhyggjur af honum. Vörnin okkar gegn honum gekk mjög vel síðast þannig að við þurfum frekar að hafa áhyggjur af öðrum leikmönnum Bakken Bears." Með sigri í leiknum eru Keflvíkingar nánast öruggir með að vinna riðilinn og munu leikmenn liðsins því kappkosta að ná því markmiði. "Þetta er algjör úrslitaleikur fyrir okkur en ef þeir ná að vinna munu þeir vinna riðilinn. Þetta er mjög einfalt í okkar huga; Við ætlum að vinna þennan riðil," sagði Sigurður Ingimundarson. Hægt er að fylgjast með leiknum á heimasíðu Keflavíkurliðsins (www.keflavik.is/karfan).