Slegist um bók ráðherradóttur

Cecelia Ahern, 23 ára gamall rithöfundur og dóttir forsætisráðherra Írlands, segist engan áhuga hafa á því að feta í fótspor föður síns. Fyrsta skáldsaga hennar, Ps. Ég elska þig, sem út er kominn í íslenskri þýðingu, hefur enda fengið glymrandi viðtökur. Útgefendur og kvikmyndafyrirtæki, bæði austan hafs og vestan, hafa slegist um útgáfuréttinn. Cecelia hafði aðeins skrifað fyrstu tíu kafla bókarinnar þegar breskt útgáfufyrirtæki tryggði sér útgáfuréttinn. Það var fyrir tveimur árum og Cecelia aðeins tuttugu og eins árs. Móðir hennar fullyrðir að stúlkan hafi sest við skriftir sökum þess að hún nennti ekki í frekara nám, en þó hefur hún BA-próf í fjölmiðlun upp á vasann. Bókin hefur verið þýdd á yfir 30 tungumál og alls staðar fengið afar jákvæð viðbrögð. Sigurður A. Magnússon þýddi bókina á íslensku - sögu, sem Cecilia segir einfaldlega hafa komið til sín. Hún fjallar um gleði, sorg, ást og dauða og er tileinkuð David, kærasta hennar til þriggja ára. Í Bandaríkjunum var slegist um útgáfurétt á bókinni og fékk Cecelia greidda eina milljón dala í fyrirframgreiðslu. Þá hófust slagsmálin um kvikmyndaréttinn og fyrir hann fékk hún aðra milljón dala.  Eins og áður sagði er Cecilia dóttir Bertie Ahern, forsætisráðherra Írlands. Þrátt fyrir að ljóst sé að hún hafi fengið góðar gáfur í vöggugjöf, eða kannski vegna þess, þá hyggur hún ekki á feril í stjórnmálum.